Great30 (G30) - İnnovasiyalar Agentliyi

30 ən bacarıqlı və istedadlı gəncə ölkənin öndə gedən şirkətlərində işləmək şansı verən layihə

Məqsədimiz

Etiraf etməliyik ki, ixtisaslı kadr olmaq üçün təkcə ali məktəb auditoriyasında qazanılan biliklər yetərli deyil. Mütəxəssis mütəmadi olaraq ixtisasını artırmalı və təkmilləşməlidir. Aldığı nəzəri bilikləri praktiki biliklərlə möhkəmləndirməlidir.

Böyük şirkətlərin insan resursları mütəxəssislərinin əsas məqsədi şirkətlərinə mümkün qədər ixtisaslı və təcrübəli kadrlar cəlb etməkdir. Bəzən onlar ixtisaslı və təcrübəli kadrları çalışdıqları iş yerlərindən cəlb (head-hunt) edirlər.

Nəticədə kifayət qədər bilikli, geniş elmi potensiala malik amma iş təcrübəsi az olan kadrlar öz potensiallarını nümayiş etdirmək şansı qazana bilməyib işsiz qalırlar.

Bunu nəzərə alan İnnovasiyalar Agnetliyi Azərbaycanın öndə gedən şirkətləri ilə bir araya gələrək G-30 layihəsini həyata keçirməyi planlaşdırıb.

Sponsor şirkətlərin məqsədi:

İnsan potensialını inkişaf etdirmək
Yüksək ixtisaslı, peşəkar mütəxəssislər hazırlamaq
Tədrislə iş mühiti arasında daha sıx əlaqələr yaratmaq
Məzun olmuş gənclərin məşğulluq probleminin həllinə kömək göstərmək
Liderlik potensialı olan gənclərdən əsl peşəkar yetişdirmək və onlara qısa zamanda özlərini ifadə edə bilmələri üçün dəstək olmaq.

G-30 Layihəsi aşağıdakı mərhələlərdən keçir:

Sponsorlarla birgə ən uyğun namizədlər seçilir;
Seçilmiş namizədlər üçün yüksək səviyyədə biznes idarəçiliyi, marketing və başqa sahələr üzrə kurslar təşkil edərək, onlara bilik və bacarıqlarını artırmalarına imkan yaradılır;
Gəncləri yeni və kreativ layihələrə cəlb edərək onların biznesin idarə olunması istiqamətində qazandıqları bilik, bacarıq, təcrübə və potensiallarını reallaşdırmağa şərait yaradılır;
Proqramın ən uğurlu məzunları əldə etdikləri nəzəri biliklərini real işdə tətbiq etdikdən sonra onlara sponsor şirkətlərdə təcrübə keçmək və işlə təmin olunmaq şansı verilir;

I mərhələ – Seçim turu

Bu mərhələdə müsabiqə yolu ilə 40 namizəd seçilir.

Seçim üçün vacib sayılan meyarlar bunlardır:

Magistratura dərəcəsi;
Güclü analitik qabiliyyət, məntiqi araşdırma aparmaq bacarığı;
Yüksək səviyyədə yazılı və şifahi ünsiyyət qurma və təqdimat bacarıqları;
Yeniliklərə tez uyğunlaşma, keyfiyyətə fokuslanma;
Yeniliklərə və təkmilləşməyə açıq;
Dilbacarıqları ( Azərbaycan dilində səlis, Rus və İngilis dillərində yaxşı danışmaq) ;
Ofis proqramlarını bilmək;
Ölkədaxili və xarici səfərlər etmək imkanı;
23-28 yaşlı alı təhsilli Azərbaycan Respublikasının vətəndaşları

II mərhələ

Bu mərhələdə namizədlər arasından seçilmiş 40 ən bacarıqlı və bilikli gənc üçün 4-6 ay davam edən xüsusi, intensiv təlimlər və kurslar təşkil olunur. Management (İdarəetmə), Marketing/PR, HR (İnsan Resursları), Finance (Maliyyə) sahələri üzrə keçirilən təlimlər Azərbaycanın tanınmış iş adamları, beynəlxalq şirkət nümayəndələri tərəfindən aparılır. Bu təlimlərə qatılmaqla onlar:

Ofisdə peşəkar və təcrübəli şəxslərlə birgə, son avadanlıq və texnologiyalarla çalışaraq ideal təcrübə qazanırlar;
Təlimçilərin xüsusi nəzarəti, istiqaməti və “masterclass”ları ilə peşəkar kimi formalaşmağa başlayırlar;
Təcrübə müddətində müvəffəqiyyət qazanan, fərqlənən, yüksək potensiala malik uğurlu namizədlər növbəti mərhələyə keçmək imkanı qazanırlar.

Menecment

İştirakçılarımız idarəetmə üsulları haqqında geniş məlumat əldə edirlər. Eyni zamanda müxtəlif şirkətlərdə nəzəri bilikləri praktiki biliklərlə birlikdə artıraraq təcrübə qazanırlar. Layihələrin düzgün idarə olunması və inkişaf etdirilməsi istiqamətində təcrübəli mütəxəssislər dəvət edilir və onlar öz təcrübələrini iştirakçılarla paylaşırlar.